tuburanweb May 30, 2024

OUTREACH PROGRAM 2024 | SEASON 13|BRGY. KANSI & MAG-ANTOY

Sa nakalabayng duha ka mga adlaw nga Martes, petsa 21 ug petsa 28 sa Mayo tuig 2024, duha na usab ka mga Barangay sa Lungsod sa Tuburan ang nakabenipisyo sa mas gipalapdan nga senimanang pag-alagad sa katawhan sa maong Lungsod pinaagi sa LGU Tuburan Season 13 Outreach Program nga dunay temang “Bringing Services Closer to the People”.

Niadtong petsa 21 ning buwan sa Mayo ang Barangay Kansi Tuburan, Cebu maoy nakatagamtam na usab sa libreng medical ug dental consultation ug libreng tambal alang sa mga nagpakunsolta. Sa samang pagpanerbisyo usab ang Barangay Mag-antoy Tuburan, Cebu, niadto lang petsa 28 sa Mayo maoy nakatilaw sa samang programa.

Gipasalamatan sa duha ka mga kapitan sa maong mga Barangay, Kansi ug Mag-antoy ang maong hiniusang pagpanerbisyo sa LGU Tuburan ug mga Law Enforcement Units nga tudo suporta niining inisyatiba ni Mayor Aljun Diamante ug Vice Mayor Danny Diamante nga nilungtad na sa sulod sa 13 katuig diin nagbalik-balik sa ilang Barangay aron sa pagpatuhop sa mga serbisyo de pang gobyerno.

Gawas sa medical ug dental consultation naa usab ang serbisyong legal sa mga ahensya sa gobyerno sama sa Comelec, PhilSys, Department of Agriculture ug uban pa.

Anaa usab ang libreng haircut ug hair color sa mga kasundalohan ug Allen’s Beauty Studio diin usa sa mga gidugokan sa katawhan. Libreng pa ice cream ug libreng pagkaon sa mga hamtong ug kabataan samtang sila gialagaran. Sa paniudto dungan ang tanan sa pagkaon sa grasya nga gibulig sa kahitas-an dungan sa pagpasalamat niini pinaagi sa pagsayaw sa mga talentadong kasundalohan dala ang imahe ni Senior Santo Niño.

Ang maong programa daw sama sa selebrasyon sa tanang Kalamboan ug Kalampusan nga naangkon karun sa maong Lungsod ubos sa liderato ni Mayor Aljun Diamante, diin sugod sa tuig 2010 hangtud ning kasamtangan hingpit nang nasakmit sa maong Lungsod ang temang “Tuburan The Spring Of Success”.