Jerry Loterio
July 22, 2025
OUTREACH PROGRAM 2025 | SEASON 14|BRGY. ALEGRIA
Napuno sa kadasig ug paglaum ang unang Martes sa Season 14 LGU Tuburan Outreach Program ubos sa pangagamhanan ni Tuburan Mayor Christian Daniel “CD” Diamante nga gipahigayon sa Barangay Alegria Tuburan, Cebu.
Kini agig pagpadayon ug pagpalapad sa maong programa nga gisugdan sukad pa niadtong tuig 2011 ilawom sa Liderato ni Former Tuburan Mayor Aljun Diamante. Sama sa gihapon anaa ang mga nag-unang serbisyo sa munisipyo nga gidala na mismo sa ganghaan sa nahisgutang Barangay.
Atol sa maong kalihokan namahayag ang batan-ong Mayor nga si Engr. CD Diamante nga daku ang iyang pagpasalamat sa walay puas nga pagsuporta sa katawhang Tuburanon sa maong programa sukad pa sa Administrasyon sa iyang amahan. Iyang gidugang nga ubos sa iyang liderato karun, iyang paningkamotan nga mas mapalapdan pa ang mga serbisyo nga gidala niini aron sa pag-hatag ug igong katagbawan sa iyang mga konstituwente.
Samtang si Former Mayor Aljun Diamante kinsa mao na usab karun ang consultant sa opisina ni Mayor CD Diamante, nagkanayon nga mas taas ug kahigayonan karun nga mapalapdan sa iyang anak ang iyang nasugdan nga mga kalamboan sa Tuburan gumikan adunay igong panahon si Mayor CD nga makatutok sa pag-serbisyo sa katawhan.
Sa habig sa mga ahensya nga nisuporta sa maong kalihokan diha ang mga sakop sa BJMP Tuburan District Jail nga gipangulohan ni SJO4 Dindo Sines ug ang Coast Guard Substation Tuburan nga gipangulohan ni PO1 Jonathan Apas.
Samtang si Barangay Alegria Kapitan Jeffrey Balen sa iyang mensahe niingon nga daku kaayo ang iyang kalipay sa maong outreach program nga napahigayon sa iyang Barangay gumikan sigun niya dili lang kini basta programa lang kung di usa kini ka dakung opurtonidad sa pagpakita ug gugma, paglaum ug pagtinabangay nga nagdala ug maayong epekto sa kinabuhi sa iyang mga gingsakopan.
Human sa pag-pangunsulta sa Medical Team nga dala sa maong programa nagdungan ang tanan sa paniudto nga maoy nagdala ug highlights sa maong outreach program diin ang mismong mga opisyal ug mga uniform personnels ang mohukad alang sa mga nitambong sa outreach program.
