OUTREACH PROGRAM 2024 | SEASON 13|BRGY. MARMOL
Usa ka mabolukon nga kalihokan na usab ang namugna sa Lokal nga Pangagamhanan sa Lungsod sa Tuburan karung adlawa pinaagi sa LGU Tuburan Season 13 Outreach Program nga gipasiugdahan ubos sa liderato ni Mayor Aljun Diamante.
Ang maong programa malampuson nga napahigayon sa Barangay Marmol Tuburan, Cebu, nga nagdala sa temang Bringing Services Closer to the People diin nagtanyag kini sa nagkadaiyang serbisyo sa munisipyo sama sa libreng medical ug dental consultation nga dunay libreng tambal, libreng hair make-up gikan sa Allen’s Beauty Studio ingon man libreng pagpanupi sa mga kasundalohan. Anaa usab ang pa ice cream ug libreng tsinelas alang sa kabataan nga giapud-apud sa Tuburan Eagles Club Aspirants.
Diha sa maong kalihokan ang han-ay sa Sanguniang Bayan pinangulohan ni Tuburan Vice Mayor Danny Diamante inubanan sa iyang mga konsehales, lakip sa nitambong ang mga jail personnels sa BJMP Tuburan District Jail. Samtang sa habig sa Socio Civic Organizations mitambong usab ang mismong Club President sa Tuburan Eagles Club nga si Kuya Glenn Regado nga maoy nangulo sa pagpanghatag sa libreng tsinelas.
Gibana-bana nga kapin sa 300 ka mga indibidwal ang nakapahimus sa maong pagpangalagad lakip na ang kabataan nga nalingaw usab sa free throw shoot nga dunay papremyo gikan sa maayong kabubot-on ni Engr. Christian Daniel Diamante.
Human sa pormal nga programa dungan nga gisaw-an sa tanan ang libreng paniudto diin ang mismong mga opisyales sa Lungsod ang nihukad sa mga kaigsuonang Tuburanon nga gialagaran.
Sa samang higayon nipresentar usab ang mga talentadong kasundalohan pinaagi sa pagsayaw sa “I Love Cebu” jingle diin samtang nalingaw ang katawhan nanghatag usab kita ug AM/FM transistor alang sa mga tigpaminawan sa Kalamboan sa Tuburan Radio Program nga madungog sa 98.1 FM BT Radio matag alas 8 sa buntag.
Puno sa kalipay ug surpresa ang matag-usa nga nitambong sa maong Outreach Program diin mao kini ang tumong ug tuyo sa Pangagamhanan ni Mayor Aljun Diamante ang pagpatuhop sa serbisyo de pang gobyerno ngadto sa kinabag-an sa maong Lungsod.
